Садыр Жапаров Германия, Өзбекстан, Казакстан жана Кыргызстандагы электр энергиясынын тарифтерин салыштырды

Президент Садыр Жапаров калкка кайрылуусунда Германия, Өзбекстан, Казакстан жана Кыргызстандагы электр энергиясынын тарифтерин салыштырды.

Ал Европада төрт жыл жашаганын эске салып:

«Ал жакта жарыкты бир мүнөт да жөн койбойт, дароо өчүрүшөт. Анткени ал жакта электр энергиясы абдан кымбат», — деп түшүндүрдү мамлекет башчысы.

Мисал катары Германияны келтирип, ал жакта кыш мезгилинде бир киловатт-сааттын баасы болжол менен 50 евроцентти, башкача айтканда 50 сомдун тегерегин түзөрүн айтты.

Борбор Азия өлкөлөрүндө, мисалы, Өзбекстанда тариф керектөө көлөмүнө жараша өзгөрөт: орточо 1000 кВт•с пайдаланган үй-бүлө айына 500 сум, башкача айтканда 3 сом 60 тыйындын тегерегинде төлөйт. Канча көп колдонсоң, ошончолук кымбат болот.

Казакстанда, атап айтканда Алматы шаарында, тарифтер 30–50 теңге, башкача айтканда 5тен 8 сомго чейин өзгөрүп турат.

Кыргызстанда болсо азырынча баа болгону 1 сом 37 тыйын.

«Айрымдар: “Алардын айлыгы жогору да” деши мүмкүн.
Бирок бардык чыгымдарды — азык-түлүктү, медициналык кызматты, салыктарды, турак жай жана автоунаа камсыздандыруусун — кошо салыштырып көрсөк, жашоо деңгээли дээрлик окшош болот.
Ошол эле учурда бизде электр энергиясы эң арзан бойдон калууда», — деп жыйынтыктады президент.