Жогорку сот Ички иштер министринин мурдагы орун басары Курсан Асановго чыгарылган өкүмдөрдү күчүндө калтырды

19-ноябрда Жогорку сот ИИМдин мурдагы орун басары Курсан Асановго байланыштуу иш боюнча акыркы чекитти койду.

1-декабрда «Сводка АКИpress» редакциясына Жогорку соттун басма сөз кызматы билдиргендей, алдыңкы эки инстанциянын өкүмдөрү өзгөртүүсүз калтырылды.

Асанов эмне үчүн айыпталган?

Соттун токтомунда айтылгандай, 2019-жылдын март айында Баткен облусунда кыргыз-тажик чек арасында кырдаал курчуп турган маалда, айрым жарандар жана Жогорку Кенештин депутаттары абал боюнча жооптуу вице-премьер-министр Жениш Разаковго карата сын-пикирлерди айта башташкан.

Асанов болсо бул жагдайды пайдаланып, Разаковдун ишине карата коомчулукта терс пикир жаратуу, аны каралоо жана дискредитациялоо максатында өзүнүн кызмат абалын колдонгон. Ал алдын ала өзүнүн өкүл баласы Турсунбек Бейшенбеков менен сүйлөшүп алып, Разаковду жаман көрсөтүүчү атайын жалган маалыматтарды жана материалдарды чогулта баштаган. Бул маалыматтарды кийин соцтармактарга, ЖМКларга жана айрым депутаттарга таратуу пландалган. Максат — Разаковду кызматтан четтетүү маселесин Жогорку Кенеште жана өкмөттө козгоо болгон.

18-мартта Асанов Бейшенбековду үйүнө чакырып, журналисттерге жана депутаттарга жиберилчү тексттин мазмунун сүйлөшкөн. Ал Разаковдун 2010-жылы Тажикстанга чыккандыгы тууралуу түшүндүрмө каттын көчүрмөсүн да берген.

Ошол эле күнү түн ичинде Бейшенбеков Асановдун айдоочусу менен Орто-Сай айылына барып, алдын ала даярдалган телефонго «Разаков саткын, контрабандист, баңгизат саткан» деген өңүттөгү жалган маалыматтарды терип, түшүндүрмө каттын сүрөтү менен кошо журналисттерге жана айрым депутаттарга жөнөткөн. Сотто белгиленгендей, бул маалымат толугу менен жалган экенин алар билишкен.

Андан соң Бейшенбеков телефонун Ала-Арча дарыясына ыргытып жиберген, бирок аны кийин бир жаран таап алып, УКМК кызматкерлери далил катары алган.

Соттун документинде айтылгандай, Асанов — бул кылмыштын уюштуруучусу жана аткаруучусу, Бейшенбеков — анын көмөктөшү жана шериги катары көрсөтүлгөн.

Жыйынтыгында, 20-марттагы парламент жыйынында айрым депутаттар соцтармакта тараган жалган маалыматка таянып, Разаковдун ишине байланыштуу суроолорду көтөрүшкөн. Бул коомчулукта терс пикир жана өкмөт менен Разаковдун дарегине сындын күчөшүнө алып келген.

Мунун айынан Разаков сотко кайрылып, жеке ар-намысын жана ишкерлик аброюн коргоону суранган. 2019-жылдын 19-ноябрында Октябрь райондук соту «Азия-Ньюс» гезитиндеги маалыматты туура эмес деп таап, Разаковдун пайдасына 1 млн сом өндүрүп, маалыматты төгүндөөнү милдеттендирген.

Соттор кандай чечим чыгарды?

2023-жылдын 8-июнунда Бишкектин Биринчи май райондук соту:

Асановду Кылмыш-жаза кодексинин 320-беренеси (кызматтык абалынан кыянаттык менен пайдалануу) боюнча актаган.

Бирок 41-берене жана 363-берене (жалган маалымат таратууда шериктеш) боюнча күнөөлүү деп таап, жаза белгилебей койгон — анткени кылмыштын мөөнөтү өтүп кеткен.

Асанов менен Бейшенбековдун адвокаты Чынара Жакупбекова бул чечимге каршы апелляция берип, аларды толук актоону сураган. Бирок Бишкек шаардык соту Биринчи райондук соттун чечимин мыйзамдуу жана негиздүү деп тапкан.

2019-жылдын 13-августунда Курсан Асанов «кыргыз милициясынын кызыкчылыгына каршы чыкканы жана ишенимден кеткени» үчүн кызматтан бошотулган. Андан көп өтпөй Аскер прокуратурасы кылмыш ишин козгоп, аны жана анын айдоочусун, өкүл баласын жана башка жакындарын кармаган. Бул окуялар 7–8-августтагы Кой-Таш окуясынан кийин күчөгөн.