Жол кайгуул кызматкерин унаасынын капотунда сүйрөгөн аял камалды
Hyundai Accent унаасынын айдоочусу ЖКККББ кызматкеринин талабына баш ийбей, аны Юнусалиев көчөсүндө капотто сүйрөдү.
Буга чейин окуянын видеосу тараган болчу.
ЖКККББнын маалыматы боюнча, 23-майда саат 14:30 чамасында жарандар Юнусалиев көчөсүндө Hyundai Accent жана Hyundai Avante унааларынын катышуусунда болгон анча чоң эмес жол кырсыгы боюнча инспекторлорго кайрылышкан.
Документтерди тариздөө учурунда Hyundai Accent унаасынын айдоочусу протокол түзүү үчүн документтерин берүүдөн баш тарткан. Андан соң ал ЖКККББ кызматкери унаанын алдында турганына карабай унааны айдап, окуя болгон жерден качууга аракет кылган. Натыйжада инспектор унаанын капотунда сүйрөлгөн.
Унаа токтотулуп, айдоочу кармалды.
Бул факт боюнча бейбаштык беренеси менен кылмыш иши козголду. Кармалган жаран Бишкек ШИИББнын убактылуу кармоочу жайына киргизилди.
Ката көрсөңүз кабарлаңыз – ката сөздү (сүйлөмдү) белгилеп, Ctrl+Enter-ди басыңыз. Ошентип, текстти тууралаганга жардам бересиз.

