Кыргызстанда болжол менен 100 миң жарандын кош ПИН коду бар, - Санарип министрлиги

Кыргызстанда болжол менен 100 миңге жакын жаранда кош ПИН бар. Буга чейин алардын саны 300 миңге чейин жеткен. Бул тууралуу Санариптик өнүктүрүү министринин орун басары Нурсултан Кубанов 21-январда Жогорку Кеңештин жыйынында билдирди.

Анын айтымында, 200 миң кош ПИН боюнча көйгөйлөр чечилген, анткени алар олуттуу кыйынчылыктарды жараткан.

Депутат Дастан Бекешев адам каза болгондон кийин анын ПИНи эмне болорун сурады. Буга жооп катары Кубанов каза болгон адамдын ПИНи жоюларын айтты.

Ошондой эле депутат эмне себептен каза болгон жарандар шайлоочулардын тизмесинде кала берерин сурады. Бул суроого Кубанов түз жооп берген жок.

Депутаттын айтымында, шайлоо процессинде ага каза болгон кызы дагы деле шайлоочулардын тизмесинде бар экени көрсөтүлгөн.
«Ал шайлоочулардын тизмесинде бар, туугандары аны алып салууга аракет кылып жатканына карабастан. Жакында эле менин округумдагы бир жаран кайрылып, анын күйөөсү каза болгонуна карабай, дагы деле шайлоочулардын тизмесинде жүргөнүн айтты. Бул кандайча мүмкүн? Биз тизмеде болгону тирүү жана биометрикалык маалымат тапшырган адамдар гана болушу керек деп айтып жатабыз го», — деди депутат жана тизмени бере ала турганын кошумчалады.

Депутат маалымат базаларынын эмне үчүн синхрондошпой жатканын жана ЗАГСтан келген маалыматтар эмне үчүн автоматтык түрдө жаңыланбай турганын да сурады. Нурсултан Кубанов бул маселе изилденерин айтып, учурда бардык ведомстволор менен маалыматтарды синхрондоштуруу процесси башталганын билдирди.

Мамлекеттик «Кызмат» мекемесинин өкүлү Кылымбек Мадалбеков акыркы шайлоолорго ЗАГС системасынын маалыматтарына негизделген актуалдуу тизмелер берилгенин айтты. Анын сөзүнө караганда, мындай кайрылуулар аларга түшкөн эмес. Ал каза болгон жарандардын туугандарын маселени чечүү үчүн мекемеге кайрылууга чакырды.

Учурда парламент персоналдык идентификациялык номерди (ПИН) өзгөртүүнүн негиздерин жана тартибин өз алдынча аныктоо укугун Министрлер Кабинетине берүү тууралуу өзгөртүүлөрдү карап жатат.