Кара-Суу районунда Өзбекстан менен чектеш жерде жаңы өткөрмө пунктун ачуу мүмкүнчүлүгү каралууда

Кара-Суу районунда Өзбекстан менен чек арада жаңы өткөрмө пункту ачылышы мүмкүн. Бул тууралуу Кыргыз Республикасынын 2030-жылга чейинки Улуттук өнүгүү программасын ишке ашыруу боюнча 2026-жылга бекитилген Министрлер кабинетинин иш планынан белгилүү болду.

Документке ылайык, Министрлер кабинети Ош облусунун Кара-Суу районунда мамлекеттик чек арада эл аралык өткөрмө пунктун ачуу боюнча Өзбекстан Республикасы менен мамлекеттер аралык макулдашууга кол коюуну пландап жатат.

Тиешелүү макулдашууга кол коюлгандан кийин, 2026-жылдын 1-декабрына чейин республикалык бюджеттин каражатынын эсебинен Кара-Суу районунда өткөрмө пунктун куруу иштерин баштоо каралууда.

Планды ишке ашыруу үчүн жооптуу органдар болуп төмөнкүлөр белгиленген:
    •    Мамлекеттик бажы кызматы;
    •    Улуттук коопсуздук мамлекеттик комитетинин Чек ара кызматы;
    •    Транспорт жана коммуникациялар министрлиги;
    •    Тышкы иштер министрлиги;
    •    Суу ресурстары, айыл чарба жана кайра иштетүү өнөр жайы министрлиги;
    •    Саламаттык сактоо министрлиги;
    •    Президенттин Ош облусундагы ыйгарым укуктуу өкүлчүлүгү.