«Өз убагында айдоочулук күбөлүктөрдү туулган күндөрдө беришчү». Депутат айдоочулук күбөлүктөрдү берүү жана окутуу тармагындагы реформаны колдоду

Депутат Марлен Маматалиев айдоочуларды окутуу жана айдоочулук күбөлүктөрдү берүү тармагындагы реформаны колдой турганын Жогорку Кеңештин жыйынында билдирди.

Анын айтымында, реформа түп-тамырынан өзгөрүүлөрдү камтыйт жана системаны кайрадан нөлдөн баштап түзүүнү талап кылат.

«Айдоочулук күбөлүктөр боюнча бизде маселе болгон эмес беле? Муну жашырабызбы? Бир кезде автоунаа айдоону үйрөнбөгөн, автоунаа мектебинен өтпөгөн адамдарга туулган күнүнө белек катары айдоочулук күбөлүк берилген учурлар болгон. Аларды сатып да алышчу, мунун ичинде МАИ кызматкерлери да болгон. Мындай болгон эмес деп айта алабызбы? Болгон», — деди ал.

Маматалиев ошондой эле дал ушул себептен улам Кыргызстандын айдоочулук күбөлүктөрү айрым өлкөлөрдө таанылбай келгенин белгиледи.

Депутаттын айтымында, өлкө жолдорунда жыл сайын болжол менен миңге жакын адам каза табат.

«Конституцияга ылайык, аткаруу бийлигин президент Садыр Жапаров жетектейт, Конституцияда ошол эле жерде Камчыбек Кыдыршаевич [УКМКнын төрагасы Камчыбек Ташиев] да көрсөтүлгөн. Биз бүгүн жасалып жаткан иштердин баары жаман деп айтабызбы? Бул чаралар жаман жыйынтык берип жатабы? Ишенели жана аягына чейин чыдайлы. Конституцияга ылайык, элдин атынан эки гана адам сүйлөй алат — президент жана депутат. Депутат өз округунун атынан сүйлөйт, ал эми президент бүт элдин атынан сүйлөйт», — деди ал, жүргүзүлүп жаткан реформаларга түшүнүү менен мамиле кылууга чакырып.