Жогорку Кеңештин комитети Өкмөттү Эмгек министринин орун басары А. Орозбаеванын жоопкерчилигин карап чыгууга чакырды

Жогорку Кеңештин илим, билим берүү, инновациялык өнүгүү жана маалыматтык технологиялар, маданият, спорт жана жаштар иштери боюнча комитетинде Эмгек, социалдык камсыздоо жана миграция министринин санариптик өнүгүү боюнча орун басары Айнура Орозбаевага эскертүү берилди.

Жыйында эмгек жана социалдык камсыздоо тармагындагы айрым мыйзам актыларына өзгөртүүлөрдү киргизүү тууралуу мыйзам долбоору каралмак. Бул маселе күн тартибинде биринчи болуп турган. Баяндамачы — министрдин орун басары Айнура Орозбаева болчу.

Комитеттеги Министрлер кабинетинин өкүлү Айнура Орозбаева кечигип жаткандыктан маселени жылдырууну өтүндү. Комитет төрайымы Токтобубу Ашымбаева мындай көрүнүш биринчи жолу эмес экенин белгиледи: биринчи жолу ал жыйынга такыр келбей калган, экинчи жолу болсо өзүнүн ордуна башкармалыктын өкүлдөрүн жиберген.

«Бул комитетке жана жыйында каралып жаткан маселеге болгон жоопкерчиликсиз мамиле. Маселени дал ошол министрдин орун басары көзөмөлдөп жатса, ал жыйынга сөзсүз катышууга милдеттүү. Биз Канат Латипжанович (эмгек министри Канат Сагынаев) бүгүн ооруп, ооруканада жатканын билебиз. Бирок Жогорку Кеңешке карата мындай мамиле жол берилбейт», — деди ал. Ошондой эле маселени жылдырбай, тиешелүү чечим кабыл алышарын кошумчалады.

Депутат Сеидбек Атамбаев маселени күн тартибинен алып салууну сунуштады.

Депутат Гулай Машрапова министрдин орун басары Айнура Орозбаеванын мындай жүрүм-туруму мамлекеттик кызматкер үчүн кабыл алынгыс экенин айтты.

«Мен аны жеке тааныбайм, бирок ал өзүнүн ким экенин көрсөттү. Себепсиз келген жок. Жыйынды башка күнгө жылдырып, ал жоопкерчилик тартуусу керек», — деди ал.

Натыйжада маселе күн тартибинен алынды.

Комитет төрайымы Токтобубу Ашымбаева министрдин орун басарынын жоопкерчилигин мыйзам чегинде кароого чакырды.

Депутат Гулай Машрапова министрдин орун басары кызматында квалификациясы жетишсиз кызматкер иштеп жатканын белгилеп, комитеттин деңгээлинде аны жоопкерчиликке тартуу тууралуу чечим жолдоону сунуштады.

Депутат Гулшаркан Култаева буга чейин да министрдин орун басары өзү баяндамачы болуп көрсөтүлгөн жыйындарга катышпаганын эске салды.

«Бул мыйзамдар депутаттар үчүн эмес, эл үчүн кабыл алынат. Бүгүнкү мыйзам долбоору жөлөкпулдар жана башка маанилүү маселелерди камтыйт. Мунун баары кечеңдеп жатат», — деди ал жана кесиптешинин сунушун колдой турганын билдирди.

Жыйынтыгында комитет мүчөлөрү санариптик өнүгүү боюнча эмгек, социалдык камсыздоо жана миграция министринин орун басары Айнура Орозбаеванын ээлеген кызматына шайкештигин кароо тууралуу Министрлер кабинетинин төрагасына кат жөнөтүү сунушун колдошту.