Алишер Навои көчөсүнүн Алымбек датка жана Курманжан датка көчөлөрү менен кесилишкен бөлүгү ачылды

Бүгүн, 8-декабрь күнү Алишер Навои көчөсүнүн Алымбек датка жана  Курманжан датка көчөсү менен кесилишкен бөлүгү оңдоп-түзөө иштеринен кийин ачылды. 

Көчөнүн ачылышына Ош шаарынын мэри Жеңишбек Токторбаев, жергиликтүү тургундар, аксакалдар катышып, көчөнүн кызыл тасмасы кесилди.

Аталган көчөнү мэрия буга чейин кеңейтүү максатында жапкан. Оңдоп-түзөө иштеринен кийин көчө бир паласага кеңейип, 5 паласа болуп калды. Ошондой эле көчөнүн тротуарына асфальт төшөлүп, атайын тосмолор менен тосулган.

Ош шаардык жолдор башкармалыгынын башчысы Жеңишбек Шоноев билдиргендей, көчөнү «Аэродромдорстрой» ААКсы оңдоп-түзөөдөн өткөрдү. Азырынча жолго канча акча сарпталганы боюнча так смета чыга элек.

«Болжол менен 20 млн сом сарпталды. Бирок, так сметасы анык боло элек», - деди Шоноев.

Буга чейин Алишер Навои көчөсүнүн Курманжан датка жана Гапар Айтиев көчөлөрү менен кесилишкен бөлүгү кеңейтилип, 6 паласа болгон эле.  Эми аталган көчөнүн бүгүн ачылган бөлүгү 5 паласа, калган бардык бөлүгү 6 паласа болду.