«Бизге үйрөтпөй эле коюшсун», - деп жооп берди Талиева президенттин маалымат кызматынын жетекчисине

«Бизди үйрөтпөгүлө. Мыйзамдарды биз жаңгак чаккандай эле билебиз», — деди депутат Камила Талиева 15-январда Жогорку Кеңештин жыйынында. Ал президенттин басма сөз кызматчысы Дайырбек Орунбековдун мамлекеттик сыйлыктар тууралуу мыйзам долбоору боюнча Талиевага карата айткан пикирине жооп берди.

«21-октябрда мыйзам долбооруна комментарий калтыргыбыз келген. Бирок бул мүмкүн болгон жок. Мен бул мыйзам долбоорлорун 10 жолу окуп чыктым. Мен мурда Маданият министри болгонмун жана “Эл акыны” деген наам кандай ыйгарыларын жакшы билем», — деди депутат.

Орунбеков социалдык тармактарда депутат бул маселени Жогорку Кеңештин трибунасынан көтөрүүдөн мурда, адегенде тактап алып, андан кийин микрофонго чыгышы керек болчу деп жазган.

«Мамлекеттик сыйлыктар тууралуу мыйзам долбоору 2025-жылдын 17-декабрында расмий түрдө Жогорку Кеңешке киргизилген. Мыйзам долбоорунда “Кеменгер” деген наам тууралуу эч кандай айтылган эмес. Сиздерге мыйзам долбоору менен таанышып, аны кунт коюп окуп чыгууну сунуштайм. “Эл акыны” жана “Эл жазуучусу” наамдары боюнча айтсак, сиздер булар бириктирилип кеткен деп айтып жатасыздар — депутаттар бул маселени талкуулап, сунуш-пикирлерин берип, толуктоолорду жана өзгөртүүлөрдү киргизе алышат», — деди ал.