«Жогорку Кеңештеги трибуна жеке маселелер үчүн эмес». Депутаттар кесиптешинин сөзүн сындашты

Депутат Эрулан Кокулов 10 мүнөт сүйлөп, журналисттердин ишмердүүлүгү жөнүндө ой бөлүштү. Ал маалымат кызматкерлерине кесиптик этиканы сактоону жана мыйзамды урматтоону чакырды. Анын айтымында, мурунку сөзүнөн кийин өзүнө маалыматтык басым болгонун сезген, анын ичинде жаңылыктарда өзүнө байланыштуу кабарларды даярдоодо.

Андан соң төрага Марлен Маматалиев депутаттык топтордун лидерлери менен өткөн кеңешмеде чечим кабыл алынганын белгилеп, 10 мүнөттүк сөздөр фракция лидерлери аркылуу макулдашылышы керек экенин билдирди. Ал ошондой эле депутаттарды трибунадан маанилүү жана коомго тиешелүү маселелерди көтөрүүгө чакырды.

Депутат Акылбек Түмөнбаев трибунадан маанилүү маселелерди көтөрүү керектигин, ал эми жеке нааразычылыктарын социалдык тармактарда билдирсе болорун айтты.

«Бул анын жеке кызыкчылыгы, бирок ал 15 мүнөт сүйлөп, бул жерде отурган көп депутаттардын убактын алды. Өзүнүн жеке маселелерин ал өзүнүн баракчасында жарыялаш керек. Же ал мыйзам долбоорун жазып жатам, же бир долбоорду сунуштап жатам деп айтса болмок. Бирок ал бул жерде гаишник менен, журналист менен чырдашканын айтып жатат. Эгер чырдашса, бул анын жеке иши.

Ал Жети-Өгүз, Тоң райондорунан жана Каракол шаарынан шайланган. Ал жерлерде мектептер, суу маселелери көп. Бирок ушул маселелерди көтөрбөйт. Урматтуу төрага, сиз да адилеттүү болушуңуз керек: ал кандай тема көтөрөөрүн сурап, анан 10 мүнөт беришиңиз керек. Бизге жеке чыр-чатактар кереги жок. Эгер ал үй-бүлөсү, гаишник же журналист менен чырдашса, аны трибунадан эмес, башка жерде кылсын.

Бул Жогорку Кеңештин трибунасы… Бул жерде улуу адамдар, «легендарлуу парламенттин» өкүлдөрү сүйлөгөн», — деди Түмөнбаев.

Түмөнбаевдин айтымында, мындай учур биринчи жолу болгон жок, мунун мурда да кайталанган учурлары бар. Ал Кокуловду мындай маселелерди жеке тартипте чечүүгө чакырды.

Депутат Эльвира Сурабалдиева да комментарий берип, мурунку чакырылышта ага жеке маселелерди көтөргөнү үчүн сүйлөөгө уруксат берилбегенин айтты.

«Бул чакырылышта, балким, бири-бирине өзгөчө мамиле бардыр, сиз бир фракциядан болосуз. Көп жолу трибунага чыгуу мүмкүнчүлүгү берилет. Менде да жеке маселелер боюнча билдирүүлөр бар: куугунтуктар, адамдардын чыгышы. Бирок бул жеке маселелер.

Мен мындай темаларды башка аянтчаларда талкуулап, подкасттарда же маалымат каражаттарында айткым келет. Бул жогорку трибунадан биз элдин пикирин, шайлоочулардын көйгөйлөрүн жана өлкөдөгү маселелерди көтөрүшүбүз керек.

Өзүңүздөргө белгилүү соңку окуяларда дагы мага каршы туура эмес маалыматтар таратылган. Бирок мен жеке нааразычылыктарымды же абройума доо кетиргенди трибунадан көтөрбөйм. Бул трибуна башка маселелер үчүн», — деди ал.

Төрага Марлен Маматалиев депутаттык топтордун лидерлери менен өткөн кеңешмеде Жогорку Кеңештин трибунасында мамлекет жана коом кызыккан маанилүү маселелерди гана көтөрүү чечим кабыл алынганын айтып, 10 мүнөттүк сөз сурап алуу укугу фракция лидерлерине же алардын орун басарларына гана берилиш керектигин айтты. Ошондой эле сөз темаларын алдын ала макулдашуу сунушун жасады. «Урматтуу лидерлер, кайсы маселени көтөрөрү такталышы керек», — деп кошумчалады спикер.

Ал депутат Эрулан Кокулов азырынча эч кандай топко кирбегенин, бирок регламент боюнча 10 мүнөттүк сөзгө чыгууга укугу бар экенин белгиледи. «Ал сөз сурап, мен добуш берүүгө койгом, сиздер да колдогонсуздар. Бирок келечекте тартип орнотуш керек», — деди Маматалиев.

Төрага  ошондой эле сүйлөө темаларын алдын ала макулдашуу практикасын карап чыгууну сунуштады, башка өлкөлөрдөгү парламенттердегидей, трибунадагы иштерди системалаштыруу үчүн.

Андан соң депутат Эрулан Кокулов сүйлөп, кесиптештерин сөздөрүн бурмалоого жол бербөөгө чакырды.

«Депутат мыйзамдарды гана иштеп чыкбайт, ошондой эле алардын аткарылышын көзөмөлдөйт. Сиздер менин өзүмдү коргоп жатат деп айтып жатасыздар. Жок, мен мыйзам бузууларды айтып жатам жана мыйзамдуулукту сактоого чакырам.

Акылбек мырза, мен кайдан келгенимди жакшы билем. Сиз эмнеге нааразы экендигиңизди да билем. Шайлоо процессинде эмне болгонун билем. Ар бириңиздер кантип келгенин билем», — деди Кокулов.