Жогорку лига: «Мурас Юнайтед» «Манчестер Сити» жана Гана курама командасынын мурдагы оюнчусун өз курамына кошуп алды

Манас шаарынын «Мурас Юнайтед» клубу курамын мурда "Манчестер Сити" клубунда ойногон жана Гананын улуттук курама командасынын футболчусу Томас Агепонг менен толуктады.

29 жаштагы вингер кышкы трансфердик терезеде «Мурас Юнайтедге» өтүп, 21-мартта командага кошулду.

Агепонг футболдук карьерасын Ганада Right to Dream академиясында баштаган.

2015-жылдын башында ал «Манчестер Сити» системасына кабыл алынган, бирок ошол эле жылдын жайында Нидерланддагы Твенте клубуна бир сезонго ижарага берилген. Бул командада ал марокколук Хаким Зиеш менен бирге ойноп, Дирк Кёйт ойногон Фейеноорд клубуна каршы талаага чыккан.

Андан кийин ганалык футболчу кайра «Манчестер Ситиге» кайтып келип, дароо эле эки жылга башка нидерланддык клуб — НАК Бредага ижарага берилген. Бул клубда ал "Эмменге" каршы матчта ойнойт, ал эми атаандаш курамында Кыргызстандын мурдагы курама оюнчусу Виктор Майер да талаага чыккан.

«НАК Бредадагы» ийгиликтүү оюнунан кийин Агепонг Гананын курама командасынын машыктыруучуларынын көңүлүн буруп, улуттук курамага чакырылган.

Ал Гана улуттук курама командасы («Кара жылдыздар») курамында 2017-жылдын 11-июнунда Африка улуттар кубогунун тандоо турунда Эфиопияга каршы оюнда дебют жасаган. Ал толук матчты оң канатта ойноп, Асамоа Гьянга голдук пас берген.

2018-жылдын жайында Агепонг кайра «Манчестер Ситиге» кайтып келген, бирок бир жыл ичинде негизги курамда бир да оюн өткөргөн эмес.

2019-жылдын май айында ал кайрадан ижарага берилген — бул жолу Шотландиядагы Хиберниан клубуна, ал жерде сезон аягына чейин 3 ай ойногон. Шотландияда ал австралиялык Марк Миллиган менен бир командада ойногон. Миллиган 2015-жылы Бишкектеги Дөлөн Өмүрзаков атындагы стадиондо да оюн өткөргөн.

Ошол эле жылы жайында Агепонг Гананын курама командасы үчүн дагы бир нече оюн өткөргөн, анда курамда Жордан Айю жана Андре Айю да ойноп жүрүшкөн.

Андан кийин ал 3 жыл бою Бельгия чемпионатында ижарада ойноп, "Васланд-Беверен" жана "Ломмел" клубдарынын намысын коргогон. 2022-жылдын жайында ал «Манчестер Сити» менен жолун жыйынтыктап, негизги курамда бир да оюн өткөрбөстөн клубдан кеткен.

Бир жыл бою командасыз жүргөн оюнчу 2023-жылдын жайында Эстония чемпионатына өтүп, "Пайде" клубунда ойногон. Бул команданын курамында ал УЕФАнын Конференциялар лигасынын тандоо оюндарында 5 матчка катышкан.

2025-жылы кайра командасыз калган вингер 2026-жылдын февралында «Мурас Юнайтедге» кошулган.

23-мартта ал Кыргызстандын чемпионатында "Кыргызалтын" командасына каршы оюнда дебют жасашы мүмкүн.