Акжол Махмудов — Кыргызстандын тарыхында грек-рим күрөшү боюнча Азиянын төрт жолку чемпиону болгон биринчи спортчу

Акжол Махмудов 7-апрелде грек-рим күрөшү боюнча 2026-жылкы Азия чемпионатында алтын медаль жеңип алды.

Турнир ушул күндөрү Бишкек шаарында өтүп жатат.

Махмудов 77 кг салмак категориясында күч сынашып, мелдешти 1/8 финалдан баштады. Кыргызстандык балбан төрт ирет удаа жеңишке жетишип, жыйынтыгында алтын медалга ээ болду.

Бул анын чоңдор арасындагы Азия чемпионаттарындагы төртүнчү алтын медалы болду. Мындай жетишкендикке Кыргызстанда грек-рим күрөшү боюнча буга чейин эч ким жеткен эмес.

Акжол Махмудов алгачкы жолу 18 жашында — 2018-жылы Бишкекте өткөн Азия чемпионатында чемпион болгон.

Андан кийин ал 2022-жылы Монголияда жана 2023-жылы Казакстанда өткөн Азия чемпионаттарында дагы алтын медаль жеңген.

Ал эми грек-рим күрөшү боюнча чоңдор арасындагы Азия чемпионаттарында үч алтын медалы бар Жоламан Шаршенбеков бул мелдешти жаракат алганына байланыштуу өткөрүп жиберүүдө.