Чүйдөгү бетон заводдо 3 адамды бетон конструкциясы басып калган

Аламүдүн районуна караштуу Кара-Жыгач айылында жеке ишкана аймагында өлүм менен аяктаган кырсык болду. Бул тууралуу 23-сентябрда Чүй облусунун ИИББнин басма сөз кызматы кабарлады.

Маалыматка караганда, 22-сентябрь күнү саат 14:10 чамасында милицияга чакыруу түшүп, анда «НБ» ЖЧКсында бетон конструкциясы адамдарды басып калгандыгы айтылган.

Окуя болгон жерге Аламүдүн райондук ИИБнин тергөө-оперативдик тобу барган. Тергөө органдарынын маалыматы боюнча, бетон аралаштыруучу мунара орнотулуп жаткан учурда жабдуу имараттын үстүнө кулап, ичинде үч жумушчу болгон: 1995-жылы туулган слесарь Н.Б., 1990-жылы туулган оператор Ж.А. жана 1978-жылы туулган экинчи оператор К.Э. (чет элдик жаран). Куткаруучулар менен милиция кызматкерлери аларды урандылардын алдынан жансыз абалда табышкан.

Бул факт Кылмыш-жаза кодексинин 272-беренеси («Тоочу, курулуш жана башка иштердин коопсуздук эрежелерин бузуу») боюнча катталды.

Милиция 1979-жылы туулган А.А., 1990-жылы туулган И.И. жана 1990-жылы туулган Л.В. аттуу шектүүлөрдү кармады. Учурда тергөө жүрүүдө.

«АКИпресс Сводкасынын» редакциялык булактарынын маалыматына ылайык, окуя «Нова бетон» ЖЧКсында болгон. Адилет министрлигинин маалымат базасындагы маалыматка ылайык, компания товардык бетонду (даяр бетон аралашмасын) чыгаруу менен алектенет. Расмий жетекчи болуп Исмагомбетов Ильяс Джакслыкович көрсөтүлгөн, ал эми негиздөөчүсү — Керимкулов Адилет Султанович. «Нова Бетон» ЖЧКсы 2025-жылдын 3-мартында каттоодон өткөн.