Кыргызстандык балбан кыргызстандык машыктыруучу машыктырган египеттик балбандан кол медаль үчүн мелдеште утулуп калды

Кыргызстандын спортчусу Куттубек Абдуразаков Сербияда өткөн грек-рим күрөшү боюнча жаштар арасындагы дүйнө чемпионатында коло медаль утуп ала алган жок.

Ал 63 кг салмак категориясында күч сынашып, мелдешти 1/16 финалдан баштаган.

Кыргызстандык балбан алгач Азия чемпиону (U-20) болгон өзбекстандык спортчуну жеңип, андан кийин индиялык каршылашын мөөнөтүнөн мурда утуп чыккан. Чейрек финалда болсо ал Европа чемпионатынын (U-15) коло байге ээси, Нидерланд өкүлүнөн үстөмдүк көрсөткөн.

Абдуразаков жарым финалда чоңдор арасындагы 2025-жылкы дүйнө чемпионатынын коло байге ээси, молдовалык балбан Виталий Еременко менен күрөшүп, ага утулуп калган.

21-октябрда коло медаль үчүн болгон таймашта кыргызстандык спортчу Египеттин өкүлү менен беттешкен. Египет командасын бул чемпионатта Кыргызстандын мурдагы машыктыруучусу Азат Эркимбаев жетектеп жүргөн.

Куттубек Абдуразаков 2:3 эсебинде утулуп, жыйынтыгында 5-орунду ээледи.

63 кг салмактагы жыйынтыктар:

1/16 финал
Куттубек Абдуразаков – Хусниддин Олимбоев (Өзбекстан) — 3:1

1/8 финал
Куттубек Абдуразаков – Гаурав (Индия) — 10:2

1/4 финал
Илиас Лаауина (Нидерланд) – Куттубек Абдуразаков — 5:11

1/2 финал
Куттубек Абдуразаков – Виталий Еременко (Молдова) — 1:9

Коло үчүн беттеш
Куттубек Абдуразаков – Адхам Айман Гариб Абду Эль-Сайед (Египет) — 2:3.