VML_KG фирмасынын ишмердүүлүгүнөн жабыркагандардан 230 арыз түшкөн, жалпы зыян 20 миллион сомду түзөт, - ИИМ

Алдын ала баалоо боюнча, VML_KG компаниясынын ишмердүүлүгүнөн жабыркагандар билдирген жалпы зыяндын көлөмү 20 млн сомдун тегерегинде. Бирок чыныгы чыгымдар мындан кыйла жогору болушу мүмкүн. Бул тууралуу радионун түз эфиринде КР ИИМдин Кылмыш иликтөө башкы башкармалыгынын кызматкери, юридика илимдеринин кандидаты, милициянын подполковниги Чолпон Назаркулова билдирди.

Анын айтымында, учурда жабыркагандардан 230дан ашуун арыз келип түшкөн жана алардын саны өсүүнү улантууда.

«Биздин божомол боюнча, өлкө боюнча жабыркагандардын саны 10–12 миң адамга чейин жетиши мүмкүн. Компания 40ка жакын кеңсе аркылуу иш алып барган, алардын ар биринде 200–300дөн катышуучу катталган», — деди Назаркулова.

Милициянын подполковниги алдамчылык схеманын иштөө тартибин да түшүндүрүп берди. Катышуучуларга жарнамаларды көргөнү үчүн киреше убада кылынган — бир көрүү үчүн 10 сомго чейин, ал эми түшкөн каражатты жума сайын банктардын бириндеги эсепке чыгарууга мүмкүн болот деп ишендиришкен.

Минималдуу салым 4,8 миң сомду, орточо салым 27 миң сомду, ал эми максималдуу салым 69,6 миң сомду түзгөн.

Айрым үй-бүлөлөр жалпысынан 1 млн сомго чейин каражат салган учурлар да болгон.

Ал кошумчалагандай, учурда тергөө иштери улантылып жатат. Каржы пирамидасынын ишмердүүлүгүнүн чыныгы масштабын аныктоо үчүн укук коргоо органдары көп сандаган арыздар менен иш алып барууда.