АКШда кар бороонунан улам 100дөн ашык автоунаа кагышкан кырсык катталды. Жабыркагандар бар

АКШнын Мичиган штатында 19-январда, ири жол кырсыгы катталды. Катуу кар жаашынан улам 100дөн ашуун унаа кагылышып же автомагистралдан чыгып кеткен. Бул тууралуу Associated Press агенттиги маалымдады.

Укук коргоо органдарынын маалыматына ылайык, жабыркагандар көп, бирок каза болгондор жок.

Унаалардын массалык топтолушуна байланыштуу штаттык полиция мамлекеттер аралык автомагистралдын эки багытын тең убактылуу жапты.

Окуя болгон жерде куткаруу кызматтары иштеп, жолду тазалоо жана жарым чиркегичи бар 30дан ашуун жүк ташуучу унааны эвакуациялоо иштерин жүргүзүштү.

Бул жол кырсыгы өлкөнүн кеңири аймактарын каптаган күчтүү кышкы бороондун кесепетинен болду. АКШнын Улуттук метеорологиялык кызматы аба ырайынын кооптуу шарттарына байланыштуу — өтө төмөн температуралар жана кышкы бороон-чапкындар жөнүндө — Түндүк Миннесотадан тартып Висконсин, Индиана, Огайо, Пенсильвания жана Нью-Йорк штаттарына чейин эскертүү жарыялады.

Катуу кар жаашы жана тайгак жолдор аймакта көптөгөн жол кырсыктарына алып келип, айдоочулардын коопсуздугуна коркунуч жаратууда жана негизги транспорттук жолдордогу кыймылды жайлатууда.

Метеорологдор бороон өлкөнүн түштүк жана чыгыш багытында уланат деп эскертип, айдоочуларды мүмкүн болушунча жол жүрүүдөн карманууга чакырышты.