Тhe New York Times: Иран Жакынкы Чыгыштагы беш өлкөнүн аймагында жайгашкан АКШнын кеминде жети спутниктик байланыш объектине сокку урду. Спутниктен сүрөттөр

New York Times гезити жүргүзгөн спутник сүрөттөрүнүн жана тастыкталган видеожазуулардын анализине ылайык, дем алыш күндөрү жана дүйшөмбү күнү Иран жасаган соккулар Жакынкы Чыгыштагы АКШнын кеминде жети аскердик объектиндеги байланыш жана радиолокация системаларына тиешелүү же алардын жанында жайгашкан түзүлүштөрдү жабыркаткан.

Видеожазууларда жакындап келе жаткан баллистикалык ракеталарды аныктоо үчүн колдонулган механизмдердин, спутник антенналарынын жана радиолокациялык күмбөздөрдүн (сезгич жабдууларды коргогон аба ырайына туруктуу каптамалар) бузулгандыгы көрүнөт. Бул жабдуулар АКШнын куралдуу күчтөрү тарабынан алыс аралыктагы байланыш үчүн колдонулат.

АКШ армиясынын байланыш инфраструктурасы катуу жашыруун сакталат. Ошондуктан кайсы так системалар жабыркаганы так аныкталбай жатат. Бирок сокку урулган жерлерге караганда, Иран АКШ аскерлеринин байланыш жана координация мүмкүнчүлүктөрүн бузууга аракет кылганы байкалат. Иран буга чейин да АКШнын байланыш системаларын бутага алган — өткөн жылдын июнь айында Катардагы базага сокку урган. Ушул дем алышта мындай чабуулдар кайра кайталанды.

Байланыш системаларына тиешелүү болушу мүмкүн болгон соккулар Бахрейн, Кувейт, Сауд Арабиясы жана Бириккен Араб Эмираттарындагы аскердик объекттерде да катталган.

АКШнын Борбордук командачылыгынын өкүлү бул соккулар тууралуу комментарий берүүдөн баш тартты.

Бахрейн

The Times басылмасы текшерип тастыктаган видеодо ишемби күнү Ирандын учкучсуз учагы Бахрейндеги Манама шаарында жайгашкан АКШнын Аскер-деңиз күчтөрүнүн Бешинчи флотунун штабындагы радиолокациялык күмбөзгө сокку урганы көрүнөт. Бул база АКШнын Жакынкы Чыгыштагы деңиз операцияларын координациялоочу негизги борбор болуп эсептелет.

Эртеси күнү тартылган спутник сүрөттөрү дагы бир радиолокациялык күмбөз талкаланганын көрсөткөн.

АКШнын Деңиз аскер күчтөрүнүн Бахрейндин Манама шаарындагы Бешинчи флотунун штаб-квартирасы. 

Жок кылынган эки объект AN/GSC-52B спутник байланыш терминалдары болгон. Алар АКШ куралдуу күчтөрүнө жогорку ылдамдыктагы, дээрлик реалдуу убакыт режиминдеги байланышты камсыздоодо маанилүү роль ойнойт.

Катар

Жекшемби күнү түштөн кийин тартылган спутник сүрөттөрү Катардагы Аль-Удейд авиабазасында спутник антенналары менен курчалган чатыр талкаланып, айрым антенналар жабыркаган болушу мүмкүн экенин көрсөттү.

Катардагы Аль-Удейт авиабазасы.

Аль-Удейд — Жакынкы Чыгыштагы АКШнын эң ири аскердик базасы. Ал жерде миңдеген аскер кызматкерлери жайгашкан жана база АКШнын Борбордук командачылыгынын аймактык штабы катары кызмат кылат.

Өткөн жылдын июнь айында, 12 күнгө созулган Иран-Израиль согушу учурунда, Иран ушул эле базадагы АКШ аскерлери байланыш үчүн колдонгон радиолокациялык станциянын күмбөзүн баллистикалык ракета менен бутага алган.

Кувейт

Кувейттеги Арифжан лагери тартылган спутник сүрөттөрү жекшемби таңына карата кеминде үч радиолокациялык күмбөз бузулганын же толугу менен талкаланганын көрсөтөт.

Кувейттеги Арифжан лагери.

Ошондой эле жекшемби күнү тартылган сүрөттөр Кувейттеги Али-аль-Салем авиабазасында, спутник байланыш инфраструктурасынын жанында жайгашкан кеминде алты имарат же түзүлүш жабыркаганын же талкаланганын көрсөтөт.

Кувейттеги Али-эль-Салем авибазасы.

Шейшемби күнү тартылган жаңы спутник сүрөттөрүнө караганда, базанын ошол эле бөлүгү кайрадан аткыланып, спутник жабдууларынын жанындагы дагы эки имарат олуттуу зыян тарткан.

Сауд Арабиясы

Ишемби кечинде Ислам революциясынын сакчылар корпусу Сауд Арабиясындагы Принц Султан авиабазасына ракета жана дрондор менен сокку урулганын жарыялаган.

Эртеси күнү тартылган спутник сүрөттөрү базанын жанындагы имараттын үстүнөн узундугу бир миляга жеткен түтүн көтөрүлгөнүн көрсөткөн.

Шейшемби күнү тартылган башка сүрөттө бул курулуш дээрлик толугу менен талкаланып калганы көрүнөт.

Сауд Арабияда канзаада Султан авиабазасы.

Жабыркаган имарат радиолокациялык күмбөздүн жанында жайгашкан жана негизги базадан болжол менен алты миля чыгышта, тосмо менен курчалган аймакта жайгашкан. Бул Иран бул объекттин байланыш инфраструктурасын атайылап бутага алган болушу мүмкүн экенин көрсөтөт.

Бириккен Араб Эмираттары

Жекшемби күнү тартылган төмөн сапаттагы спутник сүрөттөрү Бириккен Араб Эмираттарындагы Аль-Рувайс шаарына жакын жайгашкан аскердик базада бир нече түзүлүш жабыркаганын көрсөтөт.

БАЭнин алыс эмес Аль-Рувейс шаарында жайгашкан аскердик объект.

Баллистикалык ракеталарды аныктоо жана аларды коштоп көзөмөлдөө үчүн колдонулган AN/TPY-2 радиолокациялык системасы өткөн жылдын июнь айынан бери аткыланган имараттардын биринин жанында жайгашкан болушу мүмкүн. Бирок спутник сүрөттөрүнөн бул система жабыркаган-жабыркабаганы так аныкталган эмес.

Аль-Дафра авиабазасынан 160 чакырым чыгышта жайгашкан дагы бир соккунун максаты анча так эмес. Жекшемби күнү тартылган спутник сүрөттөрү футбол талаасындай аймактагы тыгыз жайгашкан имараттар жана чатырлар олуттуу зыян тартканын көрсөтөт.Мурунку жылдардагы сүрөттөрдө бул жерде спутник антенналары жана тарелкалары болгон. Бирок дем алыштагы сокку учурунда алар ошол жерде болгон-болбогону белгисиз.

БАЭдеги Аль-Дафра авиабазасы.

Дүйшөмбү күнү алынган спутник сүрөттөрүнө ылайык, база ошол эле аймакта кайрадан соккуга кабылган.

Буга чейин The Times гезити дем алыштагы чабуулдар учурунда Дубай, Ирак жана Кувейттеги АКШнын аскердик объекттеринде да кошумча зыяндар болгонун жазган. Жаңы спутник сүрөттөрү Иорданиядагы Муваффак-Салти авиабазасында да жабыркаган объекттер бар экенин көрсөтөт.

Бирок бул аймактардагы бузулган түзүлүштөр байланыш же радиолокация системаларына жакын жайгашкан эмес окшойт.