Өзбекстанда аптаптуу ысык басаңдайт: абанын температурасы +30…+37 градуска чейин төмөндөйт

Өткөн жумада Өзбекстандын тургундары өзгөчө ысык аба ырайын баштан кечиришти. «Өзгидрометтин» маалыматына ылайык, аптаптын эң күчөгөн маалында абанын температурасы +43…+45°C чейин көтөрүлүп, өлкөнүн түштүк жана чөлдүү аймактарында +46…+49°C чейин жеткен.

19-июлдун күндүзүнөн тарта өлкөнүн түндүк-батыш аймактарында аба ырайы салкындай баштады. 20-июлда температура чөлдүү аймактарда төмөндөсө, 21-июлдан тартып салкын аба ырайы өлкөнүн бардык аймактарын камтыйт.

20–24-июль күндөрү Өзбекстандын көпчүлүк аймагында жаан-чачын күтүлбөйт, аба ырайы ала булуттуу болот. Болгону 21-июлда Каракалпакстанда, ал эми 22-июлда Фергана өрөөнүнүн айрым аймактарында кыска мөөнөттүү жаан жаап, күн күркүрөшү мүмкүн.

Тоолуу райондордун айрым жерлеринде да мезгил-мезгили менен кыска мөөнөттүү жаан жаап, күн күркүрөшү ыктымал.

20-июлда күндүз абанын температурасы көпчүлүк аймактарда +40…+43°C, түштүктө айрым жерлерде +45…+47°C, ал эми түндүк аймактарда +34…+39°C болот.

21-июлдан тартып жуманын аягына чейин абанын температурасы төмөндөп, түнкүсүн +20…+25°C, күндүз +32…+37°C, айрым жерлерде +30°C чейин түшөт.

20–22-июль аралыгында өлкөнүн айрым аймактарында шамалдын ылдамдыгы 13–18 м/секундга чейин күчөйт. Кээ бир жерлерде шамалдын ылдамдыгы 20–22 м/секундга чейин жетиши мүмкүн.

Ташкент шаарында да жаан-чачын күтүлбөйт, аба ырайы бир аз ала булуттуу болот. 20-июлда күндүз температура +41…+43°C болсо, 21-июлда түнкүсүн +25…+27°C, күндүз +36…+38°C болот.

Ал эми 22–24-июль күндөрү борбор калаада түнкү температура +20…+23°C, күндүз +31…+34°C чейин төмөндөйт.

Шамал чыгыштан согуп, кийин батыш багытына өзгөрөт. Анын ылдамдыгы 3–8 м/секунд болуп, айрым учурларда 12–15 м/секундга чейин күчөшү мүмкүн. Кээ бир райондордо чаңдуу шамал да күтүлөт.

Ката көрсөңүз кабарлаңыз – ката сөздү (сүйлөмдү) белгилеп, Ctrl+Enter-ди басыңыз. Ошентип, текстти тууралаганга жардам бересиз.

Бөлүшүңүз:
Дагы окуңуз:

Комментарий калтырыңыз

Каттоодон өткөн гана окурман комментарий калтыра алат.
Каттоодон өтүңүз же сайттан авторизация кылыңыз