Москвада Камчы Көлбаевдин жан сакчысы "Узун Улан" кармалды

Москва шаарында (Орусия) 1972-жылы туулган, криминалдык чөйрөдө «Узун Улан» деген каймана аты менен белгилүү болгон Улан Барчакеев кармалганын ИИМдин басма сөз кызматы 4-сентябрда билдирди.

Ведомствонун маалыматына ылайык, Барчакеев ИИМдин ыкчам каттоосунда уюшкан кылмыштуу топтун активдүү мүчөсү катары турат. Маалыматтарга караганда, ал «мыйзамдагы ууру» Камчы Көлбаевдин [2023-жылдын 4-октябрында Бишкекте УКМК тарабынан жок кылынган] жакын жана ишенимдүү адамы болуп, анын жеке коопсуздугуна жооп берген.

«Ал бир нече ирет криминалдык чыр-чатактарга катышкан, ошондой эле акча талап кылып, ишкерлердин коммерциялык фирмаларын жана кыймылсыз мүлктөрүн тартып алып, кылмыштуу топтун «общагын» толтуруу менен алектенген», – деп белгиледи ИИМ.

Маалым болгондой, «Узун Улан» 2019-жылы Бишкекте болгон каракчылыкка айыпталууда. Ал учурда чет өлкөлүк ишкерден өзгөчө ири мүлк тартып алынган.

Барчакеев издөөдө жүргөн жана аны Москвадан Бишкекке алып келишти.

Учурда тергөө жүрүп жатат.