“Алай” командасы көк бөрү мелдешинде чемпион болду ФОТО

Бүгүн, 11-сентябрь күнү, Алай районунун Гүлчө айылында Алымбек датканын 225 жылдык мааракесине арналган көк бөрү боюнча чемпионат жыйынтыкталды.

Мелдешке Ош облусунун 7 районунан жети команда, Алай-2 командасы катышкан.

Уюштуруучулар билдиргендей, мелдештин тайпалык этабы кечээ, 10-сентябрь күнү башталган. Анда командалар эки тайпага бөлүнүп, өз ара оюн өткөрүшкөн. Тайпадан жеңүүчү болгон командалар өз ара оюн өткөрүшкөн.

Натыйжада 3-орун үчүн Өзгөн командасы менен Ноокат командасы чыгып, 2:0 эсебинде Өзгөн командасы жеңди.

Ал эми финалга “Алай” командасы менен Кара-Кулжа командасы чыгып, беттеш 3:2 эсебинде жыйынтыкталды.

Жыйынтыгында 1-орунду алган “Алай” командасына 600 миң, 2-орунду алган командага 400 миң, 3-орунду алган командага 200 миң, 4-орунду алган командага 100 миң сом, ал эми катышуучу командаларга 50 миң сомдон тапшырылды.

Ошондой эле, "мыкты чабуулчу", "мыкты оюнчу", "мыкты коргоочу" болгон командаларга дипломдор жана акчалай сыйлыктар тапшырылды.