Мексикада тропикалык бороондор кеминде 44 адамдын өмүрүн алды

Мексикада катуу жааган жамгырлардан улам келип чыккан суу каптоо жана жер көчкүнүн айынан кеминде 44 адам каза болду. Бул кырсыктар «Присцилла» жана «Реймонд» аттуу тропикалык бороондордон улам келип чыкканын Reuters маалымдады.

Өлкө өкмөтү өзгөчө кырдаал абалын жарыялап, жабыркагандарга жардам берүү үчүн армияны мобилизациялады.

Бир нече күнгө созулган катуу жамгырлар Мексиканын борбордук жана чыгыш аймактарында оор жоготууларга алып келди. Расмий маалыматтарга ылайык, эң көп адам курман болгон аймак — Веракрус штаты, анда 18 адам каза болгон. Идальго штатында 16 адамдын, Пуэбла штатында тогуз адамдын, ал эми Керетаро штатында бир адамдын өмүрү кыйылган.

Президент Клаудия Шейнбаум жетектеген өкмөт 139 шаарга жардам көрсөтүү үчүн өзгөчө кырдаалга жооп кайтаруу планын ишке киргизди.

«Биз Веракрус, Идальго, Пуэбла, Керетаро жана Сан-Луис-Потоси аймактарындагы абалга өзгөчө көңүл буруп жатабыз. Губернаторлор жана федералдык мекемелер менен тыгыз кызматташып жатабыз. Улуттук өзгөчө кырдаалдар комитети тынымсыз иш алып барууда», – деп билдирди Шейнбаум социалдык тармактагы билдирүүсүндө.

Кырсыктын кесепеттерин жоюу үчүн өлкөнүн Коргоо министрлиги 5 400дөн ашуун аскер кызматкерин жөнөттү. Алар кырдаалды көзөмөлдөө, коркунучтуу аймактардан элди эвакуациялоо жана жабыркаган жерлерди тазалоо иштерин жүргүзүп жатышат.