Иракта электр энергиясы толук түрдө өчүрүлдү

Ирактын Электроэнергетика министрлиги 4-март, шаршемби күнү өлкө боюнча электр энергиясы толугу менен өчүрүлгөнүн билдирди.

Кийинчерээк ведомство бул масштабдуу өчүрүүнүн себеби техникалык мүчүлүштүк болгонун түшүндүрдү. Ал Басра провинциясында жайгашкан Румейла электр станциясына берилүүчү газдын көлөмү күтүүсүздөн азайып кеткенинен улам келип чыккан. Бул станция Ирактын энергетикалык системасы үчүн негизги объекттердин бири болуп саналат. Натыйжада станциянын кубаттуулугу 1900 мегаваттка кескин төмөндөп, өлкө боюнча электр энергиясынын өчүшүнө алып келген.

Социалдык тармактарга күбөлөр жарыялаган видеолорго караганда, айрым үйлөрдө электр энергиясы бар бойдон калган. Бирок көчөлөрдөгү жарыктандыруу толугу менен өчүрүлгөн.

Ирактын INA маалымат агенттигинин билдиришинче, акыркы убактарда Иран тарабынан бир нече жолу чабуулга кабылган электр станцияларында жана электр берүү линияларында азыр калыбына келтирүү иштери жүрүп жатат.

Кийинчерээк Ирактын Электроэнергетика министрлиги өлкөнүн борбордук провинцияларындагы электр станциялары кайра иштей баштаганын маалымдады. Бул тууралуу Ирактын INA маалымат агенттиги министрликтин билдирүүсүнө таянып жазды.

Министрликтин маалыматы боюнча, буга чейин өлкөнүн түндүк аймактарындагы Ниневия, Киркук жана Салах-эд-Дин провинцияларында да электр өндүрүшү кайра жанданды. Бул иштер министрдин орун басары Халид Газаи аль-Маадхиди жетекчилиги астында жана Улуттук башкаруу борбору менен координацияда жүргүзүлгөн.

Мындан тышкары, Ди-Кар провинциясындагы буу-газ электр станциясында биринчи жана төртүнчү энергоблоктор ийгиликтүү кайра ишке киргизилгени кабарланды. Калган кубаттуулуктарды калыбына келтирүү иштери уланууда.