ОАО «Кыргызнефтегаз» компаниясындагы коррупция. Кармалгандар СИЗО-1ге камалды

Биринчи Май райондук соту 19-мартта «Кыргызнефтегаз» ААКдагы коррупция иши боюнча шектүүлөрдү камакка алды. Бул тууралуу 23-мартта «Сводка АКИpress» редакциясына райондук соттун басма сөз кызматы билдирди.

Кыргыз Республикасынын Кылмыш-жаза кодексинин 336-беренесинин 1-бөлүгү («Коррупция») боюнча козголгон кылмыш ишинин алкагында төмөнкү адамдар 16-майга чейин №1 тергөө абагына (СИЗО-1) камакка алынды:
    •    1983-жылы туулган, «Кыргызнефтегаз» ААКнын мурдагы башкармалыгынын төрагасы Н.Н.;
    •    1980-жылы туулган, «Кыргызнефтегаз» ААКнын мурдагы төрага орун басары жана ага байланышкан компаниялардын биринин директору А.Р.;
    •    1988-жылы туулган, байланышкан компаниялардын биринин директору А.Н.;
    •    1990-жылы туулган, байланышкан компаниянын мурдагы директору М.Б.

Буга чейин Мамлекеттик салык кызматы «Өз кишилер үчүн нефть: Кыргызнефтегазды кантип талкалашкан» аттуу иликтөөсүн жарыялаган. Анда компаниянын айрым кызмат адамдары мыйзамсыз аракеттерге барган болушу мүмкүн экени айтылган.

Репортажда ортомчуларды колдонуу жана чийки затты эсептен чыгаруу схемалары аркылуу компания 4 миллиард сомдон ашык чыгымга учурашы мүмкүн экени белгиленген. 2021–2025-жылдардагы операцияларды талдоо жыйынтыгында жеке түзүмдөрдүн пайдасына каражат чыгаруунун 3 схемасы аныкталган. Бул түзүмдөр мурдагы УКМК төрагасы Камчыбек Ташиевдин айланасына байланыштуу болушу мүмкүн деп айтылган.