Салык = фитр-садака. Шыкмаматов салык төлөмдөрү боюнча жаңы сунуш берди

Мамлекеттик салык кызматынын төрагасы Алмамбет Шыкмаматов 2026-жылдын 3-апрелинде радионун эфиринде калк арасында салыктарга болгон терс көз карашты өзгөртүү керектигин сунуштады.

Анын айтымында, «салык» деген сөздү көпчүлүк адамдар терс кабыл алышат, анткени алар муну өздөрү тапкан акчаны мажбурлап тартып алуу катары түшүнүшөт.

Шыкмаматов жарандардын ой жүгүртүүсүн өзгөртүү зарыл деп эсептейт жана салыктарды «салым» — өлкөнүн өнүгүшүнө кошулган ыктыярдуу салым же кайрымдуулук катары кабыл алуу керектигин белгиледи.

«Адамдар салыкка фитр-садака бергендей мамиле кылышы керек, ал эми салык кызматкерлери болсо аларга ушул кызматты көрсөтүүгө жардам бериши зарыл», — деди Салык кызматынын жетекчиси.

Ошондой эле Алмамбет Шыкмаматов Кыргызстанда калктын салык боюнча сабаттуулугу жылдан жылга жогорулап жатканын канааттануу менен белгиледи.