Садыр Жапаров Борбор Азия үчүн Шенген сыяктуу бирдиктүү виза режимин киргизүүнү сунуштады
Кыргызстан менен Тажикстандын чек араларын тактаган келишимге кол коюлгандан кийин, Кыргызстандын президенти Садыр Жапаров өзүнүн Фейсбуктагы баракчасында аймактык кызматташтыкты чыңдоо боюнча жаңы демилге көтөрдү.
Жапаров эми Борбор Азия мамлекеттери бири-бирине визасыз каттоо режимине өтүп, ал эми үчүнчү өлкөлөрдөн келген коноктор үчүн Шенген визасына окшош бирдиктүү виза киргизүү зарылдыгын белгиледи. Президент бул кадам аймактын инвестициялык жана туристтик потенциалын арттырууга чоң салым кошоорун айтты.
"Аймактык кызматташтыкты жаңы деңгээлге көтөрүп, Борбор Азияны дүйнөлүк аренада инвестиция жана туризм үчүн жагымдуу аймакка айлантууга убакыт келди", - деп жазды ал.
Кыргызстан менен Тажикстан 13-мартта чек ара боюнча тарыхый келишимге кол коюп, тараптар эки өлкө ортосундагы чек ара маселесин толугу менен чечүүгө жетишкенин жарыялашты. Ошондой эле, 2021-жылдан бери жабык турган чек арадагы эки өткөрмө бекети кайрадан ачылып, 14-марттан тарта Бишкек—Душанбе жана Бишкек—Худжанд авиакаттамдары ишке кирет.
Жапаровдун сунушу Борбор Азия мамлекеттеринин жетекчилери тарабынан кандай кабыл алынары азырынча белгисиз. Бирок бул демилге ишке ашса, аймактык интеграция жаңы деңгээлге чыгышы мүмкүн.
Ал арада Өзбекстандын Самарканд шаарында ушул жылдын 3-4-апрелинде «Борбордук Азия — Европа Биримдиги» аттуу саммит өтөөрү кабарланды.
Саммит Өзбекстан президенти Шавкат Мирзиёевдин төрагалыгы алдында өтүп, ага Казакстан президенти Касым-Жомарт Токаев, Кыргызстан президенти Садыр Жапаров, Тажикстан президенти Эмомали Рахмон жана Түркмөнстан президенти Сердар Бердымухамедов катышат.
Ага Европа кеңешинин президенти Антониу Кошта жана Европа комиссиясынын президенти Урсула фон дер Ляйен да катышаары күтүлүүдө.
Ката көрсөңүз кабарлаңыз – ката сөздү (сүйлөмдү) белгилеп, Ctrl+Enter-ди басыңыз. Ошентип, текстти тууралаганга жардам бересиз.
