Харри Кейн менен Алексия Путельяс Европанын эң беделдүү сыйлыгы - «Алтын топтун» ээси болушту
Лондондо футбол дүйнөсүндөгү эң абройлуу жеке сыйлыктардын бири — «Алтын топтун» 70-салтанаты өттү. Эркектер арасындагы башкы сыйлыкты Англия курамасынын капитаны Харри Кейн, ал эми аялдар арасындагы сыйлыкты испаниялык Алексия Путельяс жеңип алды. Салтанатта Испания футболу жана «Барселонанын» өкүлдөрү бир катар номинацияларда өзгөчөлөндү.
2026-жылдын 26-октябрында өткөн аземде «Бавариянын» чабуулчусу Харри Кейн карьерасында биринчи жолу «Алтын топко» татыды. Ал өткөн сезондо клубу жана улуттук курама үчүн бардык мелдештерде 73 гол киргизип, «Бавариянын» ички мелдештердеги ийгиликтерине чоң салым кошкон. Кейн бул сыйлыкты 2001-жылы Майкл Оуэн жеңгенден бери алган алгачкы англиялык футболчу болду.
Аялдар арасындагы «Алтын топту» Алексия Путельяс жеңип, карьерасында үчүнчү жолу бул сыйлыкка ээ болду. Ал буга чейин 2021 жана 2022-жылдары да мыкты деп табылган. Путельяс өткөн сезондо «Барселонанын» ийгиликтерине салым кошуп, Чемпиондор лигасындагы мыкты оюну менен айырмаланган.
Жаш футболчулар арасында «Барселонанын» оюнчусу Ламин Ямаль үчүнчү жыл катары менен "мыкты жаш футболчу" деп табылды. Аялдар арасындагы ушул эле сыйлыкты анын командалашы Вики Лопес алды.
Башка номинацияларда Испания курамасынын башкы машыктыруучусу Луис де ла Фуэнте "Жылдын мыкты машыктыруучусу", «Атлетик Бильбаонун» дарбазачысы Унай Симон "мыкты дарбазачы" аталды. «Барселонанын» башкы машыктыруучусу Пере Ромеу аялдар футболунда "мыкты машыктыруучу" деп табылса, каталониялык клубдун дарбазачысы Ката Коль аялдар арасындагы "мыкты дарбазачы" сыйлыгын алды.
Клубдар арасындагы номинацияларда аялдар футболунда «Барселона», эркектер футболунда Париждин «ПСЖ» клубу жеңүүчү болду. Ал эми «Арсеналдын» жана Англия курамасынын чабуулчусу Букайо Сака коомдук демилгелерге жана кайрымдуулук иштерине кошкон салымы үчүн «Сократес» сыйлыгын алды.
Мындан тышкары, Кейн эркектер арасындагы "эң мыкты чабуулчу", мексикалык Чарлин Корраль аялдар арасындагы "мыкты чабуулчу" деп табылды.
1956-жылы негизделген «Алтын топ» быйыл 70 жылдык мааракесин белгиледи. Сыйлык тапшыруу аземи алгачкы жолу Лондондо өтүп, футбол тарыхындагы биринчи «Алтын топтун» ээси Стэнли Мэттьюстун урматына уюштурулду.
Материал КР Маданият, маалымат жана жаштар саясаты министрлигинин медиа чөйрөдөгү мамлекеттик социалдык заказынын алкагында даярдалды. Материалдагы маалыматтар заказ берген тараптын көз карашын билдирбейт.
Ката көрсөңүз кабарлаңыз – ката сөздү (сүйлөмдү) белгилеп, Ctrl+Enter-ди басыңыз. Ошентип, текстти тууралаганга жардам бересиз.

