Орусиянын коргоо министри Борбор Азияга багытталган негизги коркунучту атады
Орусиянын коргоо министри Андрей Белоусов билдиргендей, Афганистандагы көп сандаган радикалдуу топтор Борбордук Азия үчүн негизги коркунуч бойдон калууда. Бул тууралуу «Интерфакс» маалымдайт, деп жазат "CentralAsia".
«Борбордук Азия чөлкөмүндөгү негизги коркунуч – Афганистандагы көптөгөн радикалдуу топтор (жалпы саны 20дан ашык, жалпы саны – 15 миңден көп адам). Алардын чектеш мамлекеттердин аймагына өтүү жана мындан ары да ички чөйрөгө сиңип кетүү коркунучу жогорулап жатат», – деди ал Бишкекте өткөн ЖККУнун коргоо министрлеринин кеңешинде.
«Региондогу кырдаалга Жакынкы Чыгыштагы туруксуздук да терс таасир тийгизүүдө, – деп улантты министр. – Айрыкча, ошол жактагы куралчан топтордун катарындагы чет элдик жоочулар Афганистанга, ошондой эле Борбор Азиянын башка өлкөлөрүнө өтүп жатышат».
Белоусовдун айтымында, ЖККУнун жоопкерчилик аймагындагы аскердик-саясий абал дагы эле чыңалган бойдон калууда.
«Биздин мамлекеттер үчүн чакырыктар күчөп жатат. Батыш тарап Орусияга стратегиялык сокку уруу аракетин улантып, уюмга мүчө өлкөлөргө да басым көрсөтүүнү көздөөдө», — деди Орусиянын коргоо министри.
Анын айтымында, ЖККУнун жоопкерчилик аймагында террордук коркунучтар сакталууда жана бул коркунучтар негизинен Афганистандан келип чыгууда.
Ката көрсөңүз кабарлаңыз – ката сөздү (сүйлөмдү) белгилеп, Ctrl+Enter-ди басыңыз. Ошентип, текстти тууралаганга жардам бересиз.
