Кара-Сууда турак үйдөн чыккан өрт бала бакчага жайылган. 87 бала эвакуацияланды. Видео
Бүгүн, 19-июнь күнү 16:06да Ош облусунун Кара-Суу шаарынын Ак-Өргө көчөсүндөгү турак жайлардын биринен өрт чыккандыгы тууралуу маалымат түшкөн, деп билдирди ӨКМден.
Маалым болгондой, өрттү өчүрүүгө саат 15:09да Кара-Суу райондук №25 ӨКБдан 1 өрт өчүрүүчү бөлүм тартылып, кошумча түрдө саат 15:15те жана 15:21де кошумча 2 бөлүм, жалпы 3 бөлүм тартылды.
"Өрт өчүрүүчүлөр кырдаалды көзөмөлгө алып, өрт чыккан үйдөн газ баллонун өз убагында алып чыгышып, андан ары жарылууну болтурбоого жетишишти. Өрт саат 16:07де чектөөгө алынды",- деп айтылат маалыматта.
Өрттүн кесепетинен кошуна жайгашкан турак үйдүн чатыры жана жеке менчик бала бакчанын ашканасы зыян тартты. Өрт учурунда бала бакчада болгон 87 бала өз убагында эвакуацияланып, ата-энелерине өткөрүлүп берилди.
Учурда өрттүн чыгуу себеби жана келтирилген материалдык чыгымдар такталууда. Кошумча маалыматтар берилет.
Ката көрсөңүз кабарлаңыз – ката сөздү (сүйлөмдү) белгилеп, Ctrl+Enter-ди басыңыз. Ошентип, текстти тууралаганга жардам бересиз.
