Жогорку Кеңештин депутаттары тарады

Жогорку Кеңеш 25-сентябрда VII чакырылыштагы депутаттардын өзүн-өзү таркатуу тууралуу токтомун кабыл алды. Бул сунушту 32 депутаттан турган демилгелүү топ алып чыккан.

Катталган 89 депутаттын ичинен 84ү «макул» добуш берди.

Алай шайлоо округунан депутат Улан Примов өзүн-өзү таркатууга зарыл болгон эки себепти атады:

жаңы шайлоо жөнүндө мыйзамдын (парламенттик шайлоонун жаңы системасынын) кабыл алынышы;

Жогорку Кеңеш менен президенттик шайлоолордун ортосундагы мөөнөттүн кыска болушу.

ЖКнын VII чакырылышынын конституциялык мөөнөтү 2026-жылдын ноябрында аяктайт. Президенттик шайлоо 2027-жылдын январында өтүшү пландалууда.

Демилгечилердин пикиринде, эки ири саясий өнөктүктүн катар өтүшү коомдук-саясий туруктуулукка таасир этүүсү мүмкүн.

Өзүн-өзү таркаткандан кийин президент парламенттик мөөнөтүнөн мурдагы шайлоону дайындоо тууралуу жарлыкка кол коюшу керек. Шайлоо жаңы система менен өтөт — 30 округдан, ар биринен 3 депутаттан (2 эркек жана 1 аял) шайланып келет.