Юдахин Догдурбек уулу дүйнө чемпионатында күмүш медалга ээ болду
Кыргызстандык Юхан Догдурбек уулу АКШда өтүп жаткан эркин күрөш боюнча жаштар арасындагы дүйнө чемпионатында 2-орунду ээледи.
23 жашка чейинки спортчулар арасындагы турнир ушул күндөрү Лас-Вегас шаарында (Невада штаты) өтүүдө.
Догдурбек уулу 61 кг чейинки салмак категориясында чыгып, 1/8 финал баскычынан баштады.
Ал Өзбекстан, Кытай жана Армениядан келген атаандаштарын жеңип, финалга чыкты.
Финалдык беттеш 18-октябрда эртең менен өттү, кыргызстандыктын атаандашы АКШнын өкүлү болду.
Алты мүнөттүк күрөштүн жыйынтыгында америкалык спортчу 4:1 эсебинде жеңип, дүйнө чемпиону болду. Догдурбек уулу 2-орунду ээлеп, күмүш медалга ээ болду.
Бул Кыргызстан үчүн аталган турнирдеги үчүнчү медаль болду. Буга чейин Кыргызстандын грек-рим күрөшү боюнча курама командасы эки коло утуп алган.
Ката көрсөңүз кабарлаңыз – ката сөздү (сүйлөмдү) белгилеп, Ctrl+Enter-ди басыңыз. Ошентип, текстти тууралаганга жардам бересиз.

