Түрк өлкөлөрүнүн биргелешкен спутниги жаңы катышуучуларды тартышы мүмкүн - ОТГ
Сүрөт: Роскосмос
Түрк мамлекеттер уюмуна (ОТГ) мүчө мамлекеттер тарабынан башталган биргелешкен кубикалык спутник (CubeSat) долбоору туруктуу өнүгүү жолунда бара жатканын жана келечекте дагы көптөгөн мамлекеттердин кызыгуусун жаратышы мүмкүн экенин ОТГнын Башкы катчысы Кубанычбек Омуралиев Бакуда өтүп жаткан ОТГга мүчө өлкөлөрдүн космостук агенттиктеринин IV жыйынында билдирди, деп жазат "CentralAsia".
Анын айтымында, бул флагмандык долбоор космостук чөйрөдөгү түрк өлкөлөрүнүн кызматташуусунун негизги багыттарынын бири болуп калды. «Бул демилге биринчи жолугушууда сунушталган учурдан бери туруктуу жана ырааттуу өнүгүп келет», – деди Омуралиев.
Ал экинчи жолугушуу 2022-жылы Ташкентте өткөнүн эске салып, анда тараптар CubeSat-долбоорун колдоону ырастап, Башкаруучу комитет түзүү боюнча макулдашканын айтты. Комитетке ар бир катышуучу жана байкоочу өлкөдөн экиден техникалык эксперт жана бирден техникалык менеджер кирген. Талкуулар 2023-жылдын октябрь айында Баку шаарында өткөн үчүнчү жумушчу жыйында жана андан кийин онлайн жолугушууларда уланган.
2024-жылдын 9–10-июлунда Астана шаарында өткөн бешинчи жолугушууда спутниктин кийинки этаптагы иштелип чыгуу планы макулдашылган. «Бүгүн биз делегациялардын бул долбоордун учурдагы абалы боюнча докладдарын күтүүдөбүз. Секретариат бул демилге мындан да кеңири масштабга жетип, жаңы катышуучуларды тартат деп ишенет. Ал эми азырынча буга чейин кошулган өлкөлөр менен активдүү иш уланууда», – деп кошумчалады Омуралиев.
CubeSat долбоору түрк мамлекеттеринин илимий-техникалык кызматташтыгынын символу жана алардын космосту биргеликте өздөштүрүүгө болгон умтулуусунун далили катары каралууда.
Ката көрсөңүз кабарлаңыз – ката сөздү (сүйлөмдү) белгилеп, Ctrl+Enter-ди басыңыз. Ошентип, текстти тууралаганга жардам бересиз.
