Пентагондун башчысы Ак үйдүн макулдугусуз Украинага курал жеткирүүнү токтоткон,-ЖМК

АКШнын коргоо министри Пит Хегсет Украинага курал-жарак жеткирүүнү токтотуу чечими жөнүндө президент Дональд Трамптын администрациясына маалымдаган эмес, деп билдирди CNN өз булагына таянып.

Телеканалдын маалыматына караганда, Пентагондун башчысынын бул чечими "ак үйдүн ичинде чоң баш аламандык жаратты, анткени администрация эмне себептен жеткирүү токтотулганын жана бул тууралуу Конгресске, ошондой эле Украина өкмөтүнө кантип түшүндүрүү керектигин билбей жатат".

Айрыкча, АКШ президентинин Украина боюнча атайын өкүлү Кит Келлог, мамлекеттик катчы жана Трамптын улуттук коопсуздук боюнча кеңешчиси Марко Рубио Украинага курал жеткирүү токтотулганын маалымат каражаттарынан билишкенин CNNге кабарлашкан.

Телеканал Трамптын бул чечим үчүн жоопкер эмес экенин айткан билдирүүсүнө да көңүл бурду. 8-июлда министрлер кабинетинин жыйынында Трамптан ким курал жеткирүүнү токтотууга уруксат бергенин сурашканда, ал: «Эмнеге сиз мага айтпай жатасыз?» — деп жооп берген. Ошол эле маалда ал Украинага аскердик жардамдын токтотулушун колдобой турганын билдирип, АКШ Киевге коргонуу үчүн курал жеткирүүнү улантып жатканын белгилеген.

CNNдин булактары билдиргендей, бул чечим Трамп июнь айында өткөн НАТО саммитине бара жатып Хегсетке АКШнын курал-жарак запасын текшерүүнү тапшыргандан кийин кабыл алынган. Ошол учурда Иран менен Израиль бири-бирине сокку уруп жаткан жана Трамп америкалык аскерлердин өзүн коргоо үчүн жетиштүү ок-дарылары бар-жогун билгиси келген. Бирок булактардын айтымында, Трамп Пентагон башчысына Украинага курал жеткирүүнү токтотуу боюнча эч кандай буйрук берген эмес.

CNN сүйлөшкөн адамдар Хегсеттин мындай чечимин анын өзүнө кеңеш берүүчү штаб башчысы же кеңешчилеринин жоктугу менен байланыштырган. Бул анын башка мекемелер менен маанилүү саясий чечимдерди координациялай албай жатканына себеп болушу мүмкүн.

Украинага аскердик жардамдын токтотулушу «Трамптын администрациясында, өзгөчө Пентагондо Хегсет турганда, саясатты кабыл алуу процесси көп учурда баш аламан жүрөрүн» айгинелейт, — деп белгилейт CNN.

Телеканалдын маалыматына караганда, бул — 2025-жыл ичинде Хегсет Украинага курал жеткирүүнү токтоткон экинчи учур. Биринчи жолу мындай чечим февралда кабыл алынган, бирок ал тез арада жокко чыгарылган.

АКШнын Украинага аскердик жардамды токтоткону 1-июлда батыш маалымат каражаттарында кабарланган. Жеткирүүлөр Трамп Украинага көбүрөөк коргонуу курал-жарагын жиберүүгө убада бергени кийин кайра жанданды.