Армения Зангезур коридорун АКШга бериши мүмкүн
Армения Зангезур коридорунун башкаруусун чет элдик логистикалык компанияга берүү мүмкүнчүлүгүн караштырып жатат. Бул тууралуу өлкөнүн тышкы иштер министрлигинин орун басары Мнацакан Сафарян билдирип, мындай чечим Еревандын жарыяланган принциптерине шайкеш келсе гана ишке ашышы мүмкүн экенин баса белгиледи, деп жазат "CentralAsia".
Бул комментарий Армениянын премьер-министри Никол Пашинян менен Азербайжандын президенти Илхам Алиевдин Абу-Дабиде өткөн төрт сааттык жолугушуусунун фонунда айтылды. Түркиялык TRT Global жазгандай, бул жолугушууда Зангезур коридору негизги темалардын бири болгон.
Зангезур коридору Азербайжандын негизги аймагын Нахчыван анклавы менен Армениянын түштүгү аркылуу байланыштырган жол болуп саналат жана көптөн бери талаш-тартыштарга себеп болуп келет. CaucasusWarReport маалыматына караганда, АКШ сунуштаган «келишимге» ылайык, бул маршрутка болгон көзөмөл жеке америкалык компанияга өткөрүлүп берилиши мүмкүн. Бул чечим бир тараптан Азербайжандын коопсуздугун кепилдөөгө, экинчи тараптан Армениянын суверенитетин сактоого тийиш. Ошол эле учурда Россия менен Иран бул процесстен четтетилет.
Ереван коридор маселесин Армения менен Азербайжандын ортосунда тынчтык келишимин түзүүгө даярдык көрүү жараяны менен байланыштуу экенин белгилейт. 2025-жылдын март айына карата эки өлкө келишим долбоорунун 17 беренесинин 15ине, анын ичинде преамбулага макул болушкан. Азырынча эл аралык доолор жана үчүнчү тараптардын жайгашуусу боюнча маселелер гана ачык бойдон калууда. Абу-Дабидеги сүйлөшүүлөрдүн жыйынтыгында эки тарап чек араларды делимитациялоо темасын да кошуп, жылыш бар экенин билдиришти.
Ката көрсөңүз кабарлаңыз – ката сөздү (сүйлөмдү) белгилеп, Ctrl+Enter-ди басыңыз. Ошентип, текстти тууралаганга жардам бересиз.
