Кыргызстанда жеке үйлөр уруксат документтерине ылайык курулат
Иллюстрациялык сүрөт
Кыргызстанда жеке турак үй куруу уруксат берүүчү документтердин негизинде жүргүзүлөт. Тиешелүү мыйзамга президент Садыр Жапаров кол койду.
«Жеке турак жай курулушу жөнүндө», «Экологиялык экспертиза жөнүндө», «Экологиялык коопсуздукту камсыздоо боюнча жалпы техникалык регламент» мыйзамдарына өзгөртүүлөр киргизилди.
«Жеке турак жай курулушу жөнүндө» мыйзамга киргизилген өзгөртүүлөргө ылайык, эми жеке турак үйлөрдү куруунун негиздери так аныкталды — курулуш иштерин жүргүзүү министрлер кабинетинин аныктаган уруксат берүүчү документтеринин негизинде гана мүмкүн болот.
«Экологиялык экспертиза жөнүндө» мыйзамга БУУнун ЕЭК конвенциясына байланышкан трансчек аралык таасир түшүнүгү киргизилди. Ошондой эле экологиялык экспертизаны жүргүзүү мөөнөттөрү кайра каралды:
- Трансчек аралык таасирге ээ объекттер үчүн — 60 иш күнү;
- I коркунуч категориясындагы объекттер үчүн — 40 күн;
- II жана III категориялар үчүн — 20 жана 10 күн.
Мындан тышкары, экологиялык коопсуздукту камсыздоо боюнча техникалык регламент тууралуу мыйзамдагы айрым жоболор такталып, терминдер (мисалы, «тоо калдыктары») жана таштандылардын көлөмү боюнча талаптар так көрсөтүлдү. Бул талаптар объекттин экологиялык көзөмөлгө алынуусу керек же эместигин аныктайт.
Мыйзам расмий жарыялангандан 10 күндөн кийин күчүнө кирет. Министрлер кабинетине жарым жылдык мөөнөт ичинде өзүнүн нормативдик актыларын жаңы талаптарга ылайык келтирүү тапшырылды.
Ката көрсөңүз кабарлаңыз – ката сөздү (сүйлөмдү) белгилеп, Ctrl+Enter-ди басыңыз. Ошентип, текстти тууралаганга жардам бересиз.
